Neste libro fálase dunha historia de amor entre nós e a pequena pantalla, de como crecemos e como aquela compañeira da nosa infancia, coleguilla de merendas, sobremesas familiares e obxecto do desexo nocturno, converteuse nun electrodoméstico máis, que mirabamos de esguello e relegaramos ao ostracismo. De nada serviron bailaríns que saltaban en quentadores, coches fantásticos, lagartos alieníxenas ou vigilantas da praia. A vida leváranos por camiños diferentes. Menos mal que, anos máis tarde, a principios dos noventa, ambos maduraramos. E a tele encheuse de investigadores perdidos en Twin Peaks, axentes do FBI desentramando Expedientes X e amiguitos treintañeros que compartían piso e pegábanse unhas risas.